(GRACE MEDIA), DILI-Fundasaun Institutu Superior Cristal (ISC) no Ensinu Superior Cristal hamutuk ho Senadu Fakuldade realiza atividade debate públiku objetivu oinsá atu kapasita estudante sira nia abilidade no mentalidade hodi sai joven ne’ebé kritiku, analitiku no mós sai joven kreativu no inovativu.
Tuir Vice Reitor I ISC, Jacinto de Oliveira Junior hatete, atividade debate públiku ne’e realiza atu komemora loron konsulta popular 30 Agusto. No liu hosi atividade ne’e mós atu promove talentu no abilidade estudante sira nian iha area diskursu públiku.
Tema jerál ba diskursu públiku ligadu ho kazu soe bebe tanba kazu soe bebe oras ne’e sai viral iha mídia sosiál no mós sai debate públiku nian. Foti asuntu ida ne’e hodi halo debate atu fó hanoin ba malu, atu fó enkoraja ba estudante sira no juventude sira, nune’e bele tau importansia no valor moris joven sira nian.
“Ami prepara ona premiu, ami la fó premiu ho valor osan, maibé oinsá atu fó motivasaun ba sira atu sira bele hatene di’ak liu tan. Ami mós iha planu ona katak atividade ida ne’e sei realiza tinan-tinan, nu’udar ajenda annul nian ba iha kalendariu,” dehan Vise Retór I ISC ba jornalista sira iha salaun ISC foin lalais.
Iha fatin hanesan , Estudante ISC, Brigida Verdial Gusmão Ximenes, sente kontente no apresia ba programa diskursu públiku ne’e tanba sai hanesan motivasaun di’ak ba sira hodi aprende liu tan iha futuru.
“Hau hanesan juventude ida, dala barak ita haree, joven sira mak sai hanesan autor ba konflitu tanba ne’e ha’u hakarak foti kona-ba asuntu juventude sai hanesan materia diskursu nian oinsá sai juventude ida ne’ebé kriativu no inovativu”, dehan nia.
Atividade ne’ebé ISC realiza hodi komemora loron 30 Agusto mak hanesan, poezia, debate no diskursu públiku no totál partisipante husi programa hamutuk ema na’in 20. Asuntu sira debate nian mak, kazu soe bebe, joventude iha konflitu no seluk tan.
Reportajen : Marcelino Fernandes
