(Grace Media), Dili- Diretór Forum Organizasaun Naun Governmental Tim or-Leste (FONGTIL), Daniel Santos do Carmo husu ba ukun-na’in sira hodi konsentra ba dezenvolvimentu no tau aas interese povu duke interese privadu no polítiku.
Tuir nia katak, FONGTIL hanesan sosiedade sivil nu’udar parseiru dezenvolvimentu governu no estadu nain haree ba situasaun polítika iha rai laran sai ameasa boot ba ekonomia rai laran no afeita ba dezenvolvimentu nasionál.
“Uza eventu ida ne'e atu hato'o apelu ka mensajen ba públiku katak tempu to’o ona hapara violensia politika uza ulun malirin hodi resolve problema hotu tuir lei no konsentra ba dezenvolvimentu nasional tau Interese povu aas liu interese politika privadu no partidaria”, dehan Diretór liuhusi konferensia imprensa ne’ebé hala’o iha nia knar fatin, Caicoli-Dili, foin lalais ne’e.
Nia haktuir, situasaun polítika ne’ebé la’o ema barak komesa lansa informasaun ne’ebé domina ho provokativus ne'ebe bele lori inistabilidade nasionál no mós halo sidadaun barak paniku. Tanba ne’e husu membru ONG nia kontribuisaun bele ajuda fahe informasaun edukativu ba povu.
Hanesan Sosiedade sivil, nia dehan, ita lakoi atu hamanas situasaun ne'e ,halo ita nia povu paniku tan, nune’e nu’udar sosiedade sivil iha responsabilidade moral atu kulia buat los ba ita ninia povu katak ita nia situasaun hakmatek ita nia atividade ekonomiku, estado, governu, media sira nian atividade agrikultura la’o di’ak ita hein prosesu preparasaun ba orsamentu ba 2020 no 2021.
“Itan hakarak sai mensajen sira ne'ebé ho karakter edukativu katak situasaun di’ak hela, buat hotu kontroladu, ita enkoraja instituisaun ida-idak hala’o nia papél hanesan Polisia, Ministeriu Publiku no forsa armada la’o ho di’ak”, nia apela.
Reportajen : Cesar Pires
