(Grace Media), Bucoli – Autoridade Postu Administrativu no Autoridade Lokál Suku Bucoli, Postu Administrativu Vemase, Munisipiu Baucau hamutuk veteranus ho komunidade sira komemora Aniversáriu ezisténsia FALINTIL- Forsa Defeza Timor-Leste (FALINTIL-FDTL), iha loron 20 Agosto 2020 ba dala haat nulu resin lima. Komemorasaun ne’e, hahu ho serimonia isar bandeira nasional.
Xefe Suku Bucoli, Terejinha dos Reis hateten, loron 20 fulan Agosto hanesan loron FALINTIL nian, ne’ebé, ohin selebra aniversáriu ba dala 45, hanesan loron ne’ebé importante FALINTIL hanesan liman kro’at povu nian hodi hanoin hikas ba heroi sira mate ba rai ne’e.
"Ohin loron 20 agosto Ita hotu hatene hanesan loron ne’ebé importante ba ita nia FALINTIL, liman kro’at povu nian, ita tenki rekorda bebeik ba Ita nia heroi sira ne’ebé mate ba rai Ida ne'e", dehan Xefe Suku liuhusi serimonia selebrasaun aniversariu FALINTIL nian, Bucoli, Baucau, Kinta, (20/08/2020).
Nia haktuir, loron FALINTIL loron ida ne’ebé importante tanba ne’e joven Bucoli oan sira tenki hatene istória no lembra nafatin istória éroi sira ne’ebé uluk luta ba independensia.
"Ba joven sira hotu ita tenki kontinua nafatin relembra istória ne’ebé uluk ita nia éroi sira halo ba rai Ida ne'e", nia sujere.
Iha fatin hanesan Veteranu, Silveiro da Silva, sente orgullu ho aniversáriu FALINTIL 45 no husu veteranu sira atu nafatin hamutuk hodi dezenvolve ita nia rain no hatudu exemplo di’ak no memoria ba jerasaun Timor-Leste.
"Hau husu ba veteranu sira hotu atu ita bele hamutuk nafatin hodi dezenvolve ita nia rain, hatudu exemplu di’ak no husik memoria ba jerasaun foun", nia afirma.
Nune’e, Diretór Eskola Bucoli, Leonardo Lopes hato'o sentimentu kontente tebes hodi partisipa iha loron FALINTIL nian tanba bele relembra hikas fali momentu ne’ebé mak golpe tama iha Timor Leste iha tinan 1975 Liu ba.
Entretantu Komemorasaun Aniversario hetan partisipasaun husi Administrador Posto Baucau, PNTL eskuadra Baucau ekipa F-FDTL Baucau inklui estudante no komunidade sira.
Reportajen: Javelino da Silva
