(Grace Media),
Dili –Prosesu rehabilitasaun ba fatin kultural Hindu oras ne’e atinji ona
porsentu rua nulu resin lima (% 25), maibé dadaun ne’e projetu lakontinua (paradu), tanba impaktu husi pandemia
Covid-19 no implementasaun estadu emerjensia.
Traballador Timor oan, Tomas
da Costa esplika, rehabilitasaun ba fatin relijiaun ne’e hetan apoiu finansiamentu
husi Goveru Timor-Leste no Indonésia tanba ne’e, hanesan fatin kultural nomós
fatin igreza ba ema Hindu sira hodi haklaken sira nia
fiar.
“Fatin ne’e reprezenta hanesan
relijiaun Hindu nian ne’ebé hari’i desde iha tempu Indonésia, hafoin halo
rehabilitasaun iha 2017, tanba parede sira kuaze monu hotu no at”, dehan Tomas ba
Grace Media iha Taibessi, Dili, Sexta (26/06/2020).
Projetu ne’e, nia haktuir,
hahu halo lansamentu ba primeira pedra konstrusaun ne’e iha 2017, partisipa
husi Eis Primeiru-Ministru, Rui Maria de Araujo hamutuk ho Ministru Turizmu iha
VI Governu konstitusionál inklui Embaixadór Indonésia iha Timor-Leste.
“Projetu ne’e akumula
traballador Timor oan na’in sanulu no traballador profesional sira husi Bali,
Indonesia, tamba ema Hindu sira mak hatene liu atu dezeña korridor sitiu
turizmu ho nia modelu konstrusaun”, nia esplika.
Material sira ne’ebé uza hodi
halo rehabilitasaun hanesan fatuk, estatua, no ai inklui materiais primas seluk,
importa husi Bali. Projetu rehabilitasaun agora paradu hela husi fulan Marsu to’o
agora tanba kauza husi pandemia Covid-19 no impelementasaun estadu emerjensia.
Reportaje:
Nilton Guterres Correia.
