Prezidente FKHTL, Costodio Soares da Costa hateten katak, FKHTL hanesan forum ida hodi halibur forsa voluntariu sira objetivu atu ajuda povu kbiit laek sira
ne’ebé presiza sira nia tulun.
“Iha loron kinta 30/07/2020, FKHTL sei komemora loron espesial ba ema kbiit laek no vulneravel sira, alem ida ne’e mós sei distribui sasan nesesidades baziku ba komunidade kbiit laek no vulnaravel sira iha suku dare”, dehan Costodio ba jornalista Grace Media iha nia knar fatin Vilaverde-Dili, Kuarta (15/07/2020).
Nia haktuir, alende FKHTL ditrubui sasan ba ema kbiit laek no vulneralvel sira nomós sei entrega uma ida ba defisiente ida ho naran Domingos Tapel de Araujo mak oras ne’e dadaun hetan moras no hela deit iha uma labele halo servisu.
Iha sorin seluk, Domingos Tapel de Araujo esplika, nia sente kontente wainhira rona informasaun katak FKHTL iha inisiativa hakarak atu ajuda nia tanba nia kondisaun saude oras ne’e lapermite hodi hala’o atividade hanesan baibain.
‘’Hau senti kontenti no agradese ba Forum Karidade Humanitari Timor-Leste(FKHTL) ne’ebé responde ba hau nia preukupasaun, hodi kontinua atu finaliza nia uma ne’ebé mak halo la hotu atu nune hau ho hau familia bele hamahan fali iha uma ne’ebé ho dignu ba ami atu hela”, Domingos agradese.
Nia subliña, ohin loron nia hetan moras no
hela de’it iha uma tanba hetan asidente eletrisidade soke iha loron 31/02/2019,
hodi halo nia sai tiha hanesan ema defisiente fiziku no agora nia hanesan ema
defisiente fiziku ne’ebé la bele halo servisu hodi sustenta nia feen ho oan
nain tolu 
nebee mak sei kiik hela. Durante ne’e nia rian ho nia alian rasik mak
suntenta nia feen ho nia oan no agora dadaun hela deit iha garajen motor nian.
“Hau husu ba Ministerio Solidariedade Social e Inclusivo atu tau matan ba hau familia liu-liu ba hau nia oan hodi hetan subsidiu ruma hodi bele suntenta netik ami nia moris, tanba hau hetan dezastre hau araska tebes wainhira hau hare hau oan sira halerik hodi husu hahan no osan atu ba eskola nian”, nia sujere.
Entertantu, Xefe Aldeia Baulok Fuguira, Andre Barreto informa, nia agradese no louva FKHTL tanba sira mai hafanu autoridade lokal sira kona-ba asaun kariedade ne’ebé FKHTL halo iha komunidade nia leet hodi tulun komunidade sira ne’ebé moris kbiit laek no vulneravel.
‘’Hanesan Xefe Aldeia, hau sente orgullu no louva FKHTL ne’ebé responde komunidade nia preukupasaun no hau konsidera asaun ne’ebé FKHTL halo ne’e hanesan milagre ida ba iha hau nia aldei Baulok Fuguira”, nia kontente.
Reportajen: Fausto Ramlos Ribeiro/Alberto Ribeiro
