(Grace
Media), Dili- Prezidente Asosiasaun Jornalista Timor Lorosa’e (AJTL), Zevonia
Viera konsidera, durante prosesu harii paz no demokrasia iha Timor-Leste hetan
kontribuisaun husi jornalista no média liuhusi publikasaun notísia.
“Jornalista no média
hotu-hotu durante ne’e kontribui ona ba dezenvolvimentu nasionál no prosesu
harii paz no demokrasia”, dehan Zevonia
liuhusi konferensia imprensa hodi komemora loron mundiál liberdade imprensa, hala’o
iha Farol-Dili, Domingu (03/05/2020).
Nia haktuir, ho komemorasaun
loron mundiál liberdade imprensa ne’ebé monu iha loron 3 fulan maiu ne’e, AJTL hakarak
kongratula jornalista no média sira tanba sira nafatin hola papél importante iha
situasaun ne’e.
“Jornalista no média
hola papél importanten tanba bele informa no eduka sidadaun sira atu halo asaun
preventiva hasoru virus korona no luta hasoru informasaun falsu sira ne’ebé ema
iresponsavél sira lansa média sosiál”, nia esplika.
Atu kombate hahalok
iresponsavel ne’e, nia subliña, jornalista no média sira tenke luta hasoru informasaun falsu ka hoax no fake news
ne’e, liuhusi publikasaun informasaun sira edukativu nune’e sidadaun sira bele prevene
husi propagasaun Covid-19.
“Husu ba jornalista
no média atu kontinua halo kobertura ba asuntu propagasaun Covid-19 ne’ebé
dadaun ne’e sai ameasa boot ba vida umanu iha mundu tomak no tenke kumpri
kodigu deontolojia”, nia sujere.
Sorin seluk, Sekretariu
Jeral AJTL, Alberico Junior informa, iha tempu agora jornalista hotu livre halo
kobertura tantu iha instituisaun públiku no instituisaun seluk atu bele hala’o
atividade jornalizmu.
“Iha independensia editorial,
atividade jornalizmu labele afavor ba polítiku sira satan avafor ba partidu ne’ebé
kompete hetan poder. Observasaun durante ne’e iha média balun afavor ba partidu
balun, tanba ne’e mak asosiasaun luta kontra ida ne’e”, nia afirma.
Nune’e mós, Prezidente
RTTL.EP, Francisco Gari konsidera, iha prosesu dezenvolvimentu presiza
partisipasaun ema hotu nian atu apoiu ba liberdade imprensa tanba servisu
jornalista ne’e importante tebes nu’udar iis ba prosesu demokrasia iha Timor-Leste.
Entertantu,
tema mundiál ba komemorasaun loron mundiál liberdade imprensa mak “hamutuk
jornalista latauk ko’alia lia los no lahalis ba polítiku-na’in sira”.**
Reportajen:
Raimundo S. Fraga
