(Grace Media) Dili-Oitavu Governu liuhusi
Sekretariu Estadu Protesaun Civil (SEPC), halo lansamentu ofisial ba vistu
traballu iha Ministeriu Interior husi Diresaun Geral Servisu Migrasaun (DJSM)
nian.
Tuir Secretariu Estado Protesaun Civil
(SEPC), Alexandrino Xavier Araujo katak, objetivu husi lansamentu vistu
traballu ne'e bazeia ba lei No. 11/2017 kona-ba migrasaun.
"Vistu sira ne'e uluk iha negosiu
estrangeiru, ohin transfere fila fali mai iha migrasaun tanba ne'e hahu ohin
dia 10/02/2020 halo ona lansamentu", dehan Alexandrino ba jornalista sira
iha edifisiu Ministeriu Interior Vila Verde-Dili, foin lalais ne'e.
Nia haktuir, ho lansamentu ne'e,
hatudu katak, oin ba oin migrasaun mak
sei fasilita hodi fó vistu traballu ba sidadaun estranjeiru nomós Timor oan
sira ne'ebé hakat sai husi nasaun Timor-Leste.
"Ko'alia kona-ba vistu presiza haree
espasu ne'ebé di'ak, maibé tuir lei foun ne'ebé mak iha presiza halo ona
tranferensia ba iha migrasaun hahu ba oin sira halo servisu vistu
traballu", nia sublina.
Governu planu para espasu iha
apropriadu, nia esplika, atu nune'e sira bele halo servisu di'ak, tanba ba oin
sei kontinua saida mak uluk iha negosiu estrangeiru halo. Entaun espasu ne'e
presiza mós atu aprofunda koñesimentu husi migrasaun.
Hafoin remata serimonia
lansamentu, hetan kedas bensaun husi amu kapelaun Polisia Nasional Timor-Leste
(PNTL) akompaña husi Diretor Geral Sevisu Migrasaun, Sekretariu Estadu
Protesaun Civil (SEPC) no funsionariu sira.**
Reportajen : Orlando Magno
Reportajen : Orlando Magno
