(Grace
Media), Dili-Sekretáriu Estadu Komunikasaun Sosial (SEKOMS) konsidera papel
Asosiasaun Jornalista Timor Lorosa’e (AJTL) importante tebes tanba sai mahon ba
jornalista sira.
“AJTL ninia papel importante
tanba sai mahon ka sumriña ba maluk jornalista sira”, dehan Sekretáriu Estadu
Komunikasaun Sosial (SEKOMS), Mericio Juvinal dos Reis Akara wainhira sai
orador kongresu AJTL ba dahaat iha studio TVE-T, Comoro-Dili, sexta (07/02/2020).
Nia haktuir, oitavu (VIII)
Governu konstitusional liuhusi SEKOMS nafatin iha komitmentu atu kontinua apoiu Asosiasaun
Jornalista Timor Lorosa’e (AJTL) nomós
TLPU (Timor Leste Press Union). Importante mak estrutura foun sira halo planu
prioridade, aprezenta ba SEKOMS atu bele fó apoiu.
“Ami
kontenti tanba TLPU halo ona kongresu, AJTL mós halo tan kongresu. Hau hanoin
ida ne’e importante, estrutura halo planu prioridade, Governu hein hela oinsá
ita bele halo kolaborasaun ba oin", Juvinal dehan.
Nia sublina, AJTL iha papel importante
tanba halo advokasia, halo formasaun ba jornalista sira atu bele garante kualidade
servisu jornalista nian iha area jornalizmu nomós oinsá tau matan ba jornalista
sira bele servisu tuir kodigu étika jornalista nian.
Entertantu, Prezidente AJTL,
David Hugo hateten, tuir lolos kongresu AJTL hala’o iha fulan Outobru, Novembru
no Dezembru tinan kotuk liu ba maibé larealiza tanba okupadu ho atividade.
"AJTL halo formasaun iha
munisipiu, tanba nee mak ami labele realiza kongresu iha tinan kotuk. Kongresu
ida ne’e prepara ba mandatu durante tinan haat hahu husi tinan 2020 too 2024”,
nia informa.
Tema ba kongresu mak "Hamutuk
Hametin no Defende Independensia Editorial". Kongresu ba dahat hala’o
durante loron rua hahu husi dia 7 to’o 8 fulan Febreiru 2020.**
Reportagen :Orlando Magno/Aniceto Belo
