(Grace Media), Manufahi–Prezidente Timor-Leste Vision (TLV) hamutuk Administradór Postu Alas,
akompaña autoridade lokál no lia-na’in, inagura projetu konstrusaun sentru
saneamentu liu-liu sintina rua nulu (20) iha suku Mahakidan,
Postu Alas, Munisipiu Manufahi.
Na’in ba implementasaun projetu mak TLV no Unidade Juventude (UJ-Bertade)
hetan apoiu husi Embaixada Australia, Department Of Foreign Effeirs And Trade (DFAT).
Tema ba serimonia mak promove moris saudável ho maneira so’e bee iha fatin.
Prezidente Timor-Leste Vision (TLV), Abel da C. Conceição hateten,
razaun prinsipal ba TLV hodi hari sentru saneamentu 20 tanba nesesidade komunidade
nian liuhusi proposta ne’ebé aprezenta husi UJ-Bertade.
Orsamentu gasta ba estabelesementu sentru saneamentu 20 iha
suku Mahakidan iha aldeia Beremanek, Tahu-Bein no Debuwa’en hamutuk trinta
e oito (38) mil dolar amerikanu.
“Projetivu ne’e gasta ho montante osan 38 mil dolar amerikanu,
ami hari konstrusaun sentru saneamentu hamutuk rua nulu (20), gastu tekniku,
gastu operasional hamutuk besik 39 mil dolar amerikanu”, dehan Prezidente TLV
ba jornalista sira iha suku Mahakidan-Manufahi, foin lalais ne’e.
Atividade konstrusaun sentru saneamentu ne’e la’o, nia dehan,
tanba hetan apoiu husi Embaixada Australia liuhusi programa Department Of Foreign
Effeirs And Trade no projetu ne’e la’o durante fulan lima (5) nia laran.
“Hau lori kolega sira no Embaixada Australia nia mensajen
katak, imi tenke uza buat ne’e ho didiak. Karik iha problema ruma bele konsulta.
Hau agradese ba komunidade sira tanba bele halo servisu ho di’ak maske servisu
ho gratuita maibé konsege hatudu rezultadu ne’ebé di’ak”, nia agradese.
Kona-ba fatin balun seidauk hetan, Prezidente subliña, nia sei
esforsu liuhusi meius oin-oin atu bele rezolve problema ne’e. Nune’e komunidade
sira labele hetan diskriminasaun, maibé trata sira tenke hanesan ka justu. Tan ne’e,
dezafia UJ-Bertade tenki halo tan proposta.
Iha sorin seluk, Administradór Postu Alas, Leopoldo Barreto hato’o
agradesementu ba TLV no Embaixada Australia inklui UJ-Bertade tanba bele hari
projetu konstrusaun sentru saneamentu iha suku Mahakidan no husu komunidade atu
kuidadu ho didi’ak.
“Favor ida estima ho kuidadu ba, buat ne’ebé mak ita nia belun
sira fó, mezmu oituan maibé ida ne’e mak fuan, muda ita nia mentalidade, muda
ita nia toman ne’ebé mak husi avo sira nian moris tradisional, atu bele lori ita
ba moris mudansa no progresu iha futuru”, Administradór sujere.
Entertantu, Xefe Suku Mahakidan, Cristovão Pereirra Sanches lori
komunidade nia naran hato’o agradesementu profundu ba TLV no Embaixada
Australia tanba bele ajuda ona komunidade sira ho total uma kain atus
ida (100) mak asesu ona projetu konstrusaun sentru saneamentu.
“Ami suku Makahida total populasaun hamutuk dois mil
quinhentos e cinquinta e quatro (2554) ho ninia total kada xefe familia setecentos
oitenta (680 ) kompostu aldeia
lima (5) hanesan, Knua Alas, Tahu-Bein, Beremanek, Debuwain no Uma Mean.**
Reportajen:
Raimundo S. Fraga
