(Grace Media), Dili-United Nations
Entity for Gender Equality and The Empowerment of Women (UN WOMEN) serbisu
hamutuk ho UPMA (Unidade Planeamentu Monitorizasaun Avaliasaun) iha Gabinete
Primeiru Ministru, realiza workshop hodi deskute kona-ba asuntu orsamentu
sensivel ba jeneru.
Prezidente Rede Feto, Judith Dias
Ximenes apresiza UN WOMAN no UPMA tanba bele konvida sira hodi fó sira nia hanoin
pozitivu hodi kontribui ba hadia orsamentu sensivel ba jeneru mak durante ne’e
Governu aloka ona.
“Objetivu mak atu prepara sosiedade
sivil ne’ebé diak atu haree lisuk
orsamentu jeral estadu nian ne’ebé sensivel ba jeneru”, dehan Prezidente Rede
Feto ba jornalista Grace Media iha Timor Plaza, Kuarta (8/8/2019).
Orsamentu sensivel ba jeneru, Judith
klarifika katak, orsamentu ida ne’ebé atende ba ema hotu-hotu ninia interese
hanesan haree ba ema ho defisiensia, ba oan kiak, bolsa da mãe, ferik katuas, LGBTY
no veteranus sira.
“Indikador sira ne’ebé ami uza mak
problema ne’ebé ami hare’e. Ne’e sai hanesan indikador katak problema ne’e,
akontese iha ne’e, ema ida ne’e, no asuntu ida ne’e. Entaun ami uza meius halo
advokasia”, Judith dehan.
Prezidente Rede Feto sublina, ko’alia
kona-ba orsamentu sensivel ba jeneru iha Timor Leste, ninia implementasaun la’o
ho di’ak tanba haree ba progresu, rezultadu no benefisiu sira mak durante ne’e
povu hetan.
Iha sorin seluk, Kordenador Programa
RHTO (Ra’es Hadomi Timor Oan), Junior da Costa de Araujo sente kontente tebes
ba atividade workshop ne’e tanba bele halo diskusaun ho maluk sosiedade sivil
sira seluk ho fó hanoin ba malu ba orsamentu sensivel ba jeneru.
“Ba sosiedade sivil sira katak liuhusi
atividade ne’e bele fó hanoin ba malu kona-ba orsamentu sensivel ba jeneru,
maibé liu husi oportunidade ne’e mós bele involve asuntu defisiensia oinsa
orsamentu ne’e la’os sensivel ba jeneru de’it, maibé ba labarik no asuntu
defisiensia”, nia esplika.
Nia afirma, durante ne’e RHTO mós halo
advokasia ba Parlamentu Nasional (PN) oinsá mak integra asuntu jeneru, asuntu defisiensia ba iha orsamentu
jeral estadu oinsá mak orsamentu jeral estadu ne’e bele sensivel ba jeneru inklui
mós ba partisipasaun feto ema ho defisiensia, labarik no joven sira.
“Liga orsamentu jeral, ita seidauk iha
sensivel, maibé parte balun sensivel ona, ita haree ba ponte CPLP ema ho
defisiensia bele asesu ona, maibé parte balun seidauk tanba seidauk iha
orsamentu espesifiku ba ema ho defisiensia”, nia preokupa.**
Reportajen: Raimundo S. Fraga/Marcelino
Fernandes
