(Grace Mídia), Dili-Tuir
rezultadu monitorizasaun no analiza mídia husi Konsellu Imprensa (KI) identifika
mídia sira kontra infrasaun kódigu étika hamutuk 77 husi mídia imprime,
eletronika no online, hahu husi tinan 2016 to’o 2019. Iha Tinan 2016 totál
infrasaun 16, tinan 2017 totál infrasaun 20, tinan 2018 totál infrasaun 30 no
tinan 2019 hahu husi Janeiru to’o Marsu totál infrasaun 11.
Infrasaun kódigu étika jornalistika mak mídia ka jornalista sira komete hanesan
kódigu étika pontus 6 no prinsipiu universal jornalistika cover both sides jornalista
sira laiha konfirmasaun ho parte seluk, lasensivel jéneru tuir prinsipiu gender sensitive reporting ka gender prespective journalism. Seluk fali
kontra kódigu étika pontu 2 jornalista sira hatama sira nia opiniaun iha
notisia laran nomós kódigu étika jornalistika pontu 5 mídia ka jornalista sira
halo julgamentu (trial by the press) ba
ema ka instituisaun seluk.
Tuir Prezidente
Interinu Konsellu Imprensa (KI), Jose Ximenes katak, KI liuhusi Departementu
Monitorizasaun no Analiza Mídia durante ne’e identifika katak mídia sira barak
mak kontra infrasaun kódigu étika.
“Hau hakarak agradese
katak Konsellu Imprensa halo
monitorizasaun, ekipa analiza mídia ne’ebé halo analiza ba mídia hothotu”, dehan
Prezidente Interinu KI iha salaun asosiasaun hak, Farol-Dili foin lalais ne’e.
Prezidente haktuir,
analiza mídia ne’e hahu iha tinan rua liu ba, iha impase politika ne’ebé
akontese iha ita nia rain to’o ohin loron kontinua akompaña atividade
jornalismu.
“Objetivu
ne’e atu fó hanoin fali ita katak ita presiza, tanba era ida agora ne’e era
aprendisajen, oras ne’e ita bele aprende di’ak liu tan ho saida mak analiza
sira halo atu nune’e bele hadia”, nia esplika.
Dala
barak jornalista sira kontra infrasaun kódigu étika Jose sublina, tanba kestaun
tempu, entaun jornalista sira tempu laiha hodi buka fontes halo entrevista.
Ikus mai, notisia mós lalais entaun mosu failansu. Failansu ne’eb’e iha Konsellu
Imprensa konsege identifika no presiza hadia.
“Iha mós parte ida
ne’ebé hato’o katak iha keixas husi komunidade ba Konsellu Imprensa kona-ba notisia.
Konsellu imprensa nia papél halo mediasaun. Agora mediasaun ita halo lubuk
ida”, Jose haklaken.*
Reportajen: Raimundo
S. Fraga/Orlando Magno
