(Grace Media), Dili-Jornalista Mundu tomak liu-liu Timor Leste selebra
loron (03/05) nudar loron mundial ba liberdade imprensa liu husi atividade long
Macha husi Rotunda Merkadu Lama to iha Terminal Becora hodi fo omenajen ba
jornalista sira ne'ebé mate tan defende lia los.
Atividade Long Marcha ne'e organiza husi Konsellu Imprensa (KI) no partisipa husi Jornalista Training husi Sentru Formasaun Grace For Development (GFD), CANOX, SMI, estudante Departementu Komunikasaun Sosial husi UNTL no UNITAL.
Hafoin remata long marcha Prezidente Konselu Imprensa,
Virgilio da Silva Guterres, iha diskursu katak, loron mundial liberdade
imprensa ne'ebé mundu tomak liu-liu Timor-Leste komemora ne'e importante tebes no
Konsellu imprensa mós iha papel importante atu garante.
"Atu garante ho hametin liberdade imprensa no
liberdade espresaun iha pais demokratiku foun ne'e, Konsellu Imprensa (KI)
hala'o papel importante atu tau matan", dehan Prezidente KI liu husi
diskursu iha rua liberdade imprensa loron, Becora-Dili,Kinta, (03/05/2019).
Prezidente KI esplika, atu garante liberdade imprensa
iha Timor-Leste jornalista, orgaun komunikasaun sosial tenke obedese nafatin
prinsipiu sira jornalismu nian no koodigu etika jornalistika bainhira ezerse
sira nia atividade loroloron nian.
"Sidadaun sira ka públiku iha direitu atu asesu
ba informasaun ida ne'ebé ezatu, balansu no kredivel tanba asesu ba informasaun
nu'udar direitu báziku ema nian ne'ebé konstituisaun garante", nia
salenta.
kona-ba ba keisa, prezidente sublina, keisa husi kedas
2016 to'o 2019 KI rejista keiza husi jornalista, asosiasaun jornalista, públiku
no instituisaun sira estadu nian. Keisa sira ne'e kona-ba violensia, ameasa no
diskriminasaun hasoru jornalista sira bainhira hala'o atividade jornalismu.
"Faktu no dadus foun iha inisiu 2019 hatudu katak
pesoal balu iha instituisaunn estadu nian ameasa no bandu jornalista sira atu
labele espresa sira nia hanoin no pensamentu kona-ba asuntu sira ne'ebé
relasiona ho interese publiku nia intervensaun politika iha redasaun RTTL E.P",
Dehan Prezidente KI.
Prezidente KI sublina, bazeia ba situasaun no faktu
sira ne'ebé iha KI hakarak ezije ba públiku, autoridade seguransa no entidade
sira estadu nian atu respeita jornalista ka media nia serbisu hodi kontribui ba
prosesu hametin demokrasia no garante boa Governasaun iha rai laran, husu mós politiku
sira liu-liu asesor no membru governu sira atu labele halo intervensaun ba iha
redausan.*
Reportajen: Orlando Magno/ Aniceto Piedade
