PREZIDENTE CNJTL: POPULASAUN TL IDADE JOVEN HETAN 60 %

(Grace Media), Dili-Tuir Prezidente Konsellu Nasional Juventude Timor-Leste  (CNJTL), Maria Dadi Magno katak, Timor-Leste nasaun ida ne’ebé dominante liu ho ema idade joven tanba ne’e CNJTL iha papel importante hodi tau atensaun.

   

“CNJTL tenke fo atensaun ba juventude sira tanba ida ne’e papel CNJTL  nian, hakarak ga lakohi  husi dadus ne’ebé mak hetan, populasaun maioria kuaze 60%  mai husi juventude ho idade joven”, dehan Prezidente CNJTL ba jornalista Grace Media iha nia knar fatin Farol-Dili, foin lalais ne’e.

Prezidente haktuir, CNJTL ninia atensaun ba joven sira mak hanesan, oferese kursu lian Ingles ho Portuges no formasaun  tekniku ho forma komputer softwere no hardwere, nune’e mós atividade politika  CNJTL nian atu bele hakbi’it koñesementu hodi nune’e bele prepara sira nia-an iha futuru ne’ebé diak.

“CNJTL  transforma  husi organizasaun  rezistensia  juventude,  tanba  ne’e,  konsellu juventude mai ho nia karakter organizasaun da massa ne’ebé ema hotu hatene katak la’os ida de’it maibé kuaze sanulu resin ha’at 14”, Prezidente esplika.

Prezidente sublina, nia mai hodi reprezenta organizasaun juventude hotu-hotu  ho vizaun no misaun ida libertasaun patria no liberta povu. Iha prosesu libaertasaun povu CNJTL mai ho paradigma foun oinsa atu kontrobui ba dezenvolvimentu nasional.

Entretantu  Juventude , Juvencio  da  Silva  Correa  katak, CNJTL  hala’o ona  servisu  barak  hahu  husi  ezistensia  mai  to’o  agora. Serbisu ne’ebé CNJTL halo, primeiru estabelese Sekretariadu  Rede  Parlamentu  Juventude  CPLP  no  Sekretariadu Forum  Komunikasaun  Juventude  Partidaria*

Reportajen: Sónia de Almeida