(Grace Media), Dili-Atu garante
kualidade edukasaun iha Timor-Leste, fasilidade sai nesesidade importante
estudante nian, maibé realidade hatudu eskola Ensinu Basiku Filial (EBF) No
04 Kuluhun tinan barak ona hasoru problema, to’o ohin loron Governu seidauk
rezolve.
Tuir
Diretor Ensino Basiku Filial (EBF) No 04 Kuluhun, Domingos
Magno katak, durante tinan barak ona eskola ne’e, hasoru problema fasilidade
hanesan sala aula, bee moos, Moru no biblioteka governu liu-liu ME (Ministeriu
Edukasaun) seidauk fo atensaun.
”Ami
nia eskola hahu rihun rua (2000), ami hasoru difikuldade barak tebes hanesan sala
aula, bee moos, moru no biblioteka, tinan naruk nia laran ami hasoru nafatin”,
dehan Diretor EBF ba Jornalista Grace
Media iha nia knar fatin Kuluhun-Dili, Sexta-Feira (29/03/2019).
Domingos hatutan, parte eskola hato’o
ona problema ne’e ba ME, maibé to’o ohin loron seidauk iha resposta. Maske iha
problema, nudar edukador nafatin iha komitmentu hanorin estudante sira atu
nune’e estudante sira bele aprende ho diak.
“Iha ami nia eskola iha edifisiu rua
(2), edifisiu sorin bee la mai tinan lima (5) ona, edifisiu sorin uza bee kanu.
Agora tama merenda eskolar ami difikuldade ba bee moos, maske ami enfrenta problema,
ami esforsu nafatin”, Domingos esplika.
Domingos argumenta, ho problema ne’e,
sira iha meius seluk uza mak, haruka estudante sira mai eskola hiit bee moos
iha aqua ida, bele mai fakar iha haris fatin no bele uza mós ba tein merenda
eskolar nian.
Kona-ba moru laiha, Domingos dehan, komunidade
balun tama livremente iha area eskola nian hodi estraga fasilidade, tan ne’e,
foi lalais ko’alia ona ho autoridade lokal
sira atu tau atensaun ba eskola refere.
“Sala ba Diretor eskola la iha, sala ba
profesores mós la, livru sira ami rai deit iha estudante sira nia fatin, ami
nia eskola ne’e profesores hamutuk rua nulu resin ida (21), professores
permanente hamutuk sanulu resin neen (16) no kontratadu hamutuk nain lima (5)”.
Domingos afirma.
Entertantu,
Estudante, Deonizio G. de Araujo Soares katak, hanesan estudante sente triste fasilidade
eskola laiha fo impaktu negativu ba prosesu
aprendisajen.
“Hau sente triste tanba iha ami nia
eskola menus fasilidade hanesan meja, ami mós sei menus hela ba bee moos, ami
atu ba haris fatin mós bee la iha, depois atu tein merenda eskolar mai ami mós
bee la iha”, estudante dehan ho triste.*
Reportajen: Natália Maria Ximenes
