VENDEDORES MERKADU TAIBESI HALERIK FATIN FAAN SASAN

(Grace Media), DILI-Maske Governu liu husi Ministeriu Komersiu Industria durante ne’e kria ona fatin merkadu ba negosiante sira hodi hala’o atividade negonegosiu, maibé realidade kondisaun merkadu Taibesi limitadu ba negosiante sira.
 

Tuir Vendedor Merkadu Taibesi, Joséfina da Conceição hatete katak, hanesan negosiante sente triste tebes tanba durante ne’e faan sasan iha merkadu ne’e, fatin kontinua limitadu hodi difikulta ba sira nia atividade negosiu.

“Hanesan vendedores, sente triste tebes tanba fatin ba ami laiha, atu rai ami nia sasan hodi fa’an, maske difikulta, maibé kontinua esforsu-an. hodi fa’an produtu atu bele responde ba ami nia vida diaria,” dehan Joséfina ba Jornalista Grace Media iha merkadu Taibesi-Dili, Sexta (17/01/2019).

Joséfina hatutan, maske governu prepara ona fatin ou kondisaun  ba  sira maibé, fatin ne’e seidauk responde  ba sira nia  exijensia tanba  vendedores balun de’it mak hetan fatin diak hodi fa’an produtu, maibé balun kontinua fa’an iha fatin ne’ebe lasaudável.  

Relasiona ho problema ne’e,  Xefe merkadu  Taibesi, Anibel de Jesus rekoiñese, fatin ne’ebé governu prepara ne’e  limitadu tebes, tan ne’e sira iha ona planu no iha tempu badak nia laran sei organiza malu atu rekoilla fila fali fatin hirak  ne’ebé mak vendedores balun lautiliza ona to’o agora.

“Razaun ne’ebé  ami  rekoilla hikas fali fatin hirak ne’e, tanba fatin hirak ne’e iha momentu Xefe Autoridade Munisipiu Dili ho Ministériu Komersiu Industria, entrega  ba sira atu  utiliza, hodi fa’an produtu . karik sira  abandona liu fulan neen, ami sei rekoilla no oferese fali ba sira ne’ebe lahetan fatin,” Anibel esplika.

Anibel argumenta, dadus atual vendedores Taibesi iha hamutuk 13. Dadus ne’e ba sira seidauk hetan fatin no provizoriumente sira sei fa’an produto iha rai. Tan ne’e iha tempu badak nia laran sira sei halo enkontro ho estrutura tomak hodi resolve problema negosiante sira nian.
Reportajen : Ekipa Kobertura