(Grace
Media), DILI-Kompañia Pixelasia Production iha Timor Leste serbisu hamutuk ho
Ministeriu Saude (MS) no Ministeriu da Edukasaun (ME) selebra loron mundial Saude Oral (SO) iha Eskola Baziku Filial (EBF) Kamea ho objetivu atu fo hanoin ba estudante
atu prevene moras nehan.
Reprezentante Ministeriu Saude, Diretora Sentru
Saude Bekora, Adelina Pinto hateten, selebrasaun loron mundial saude oral, importante
tebes ba estudante sira oinsa atu kuidadu-an atu labele mosu problema moras nehan
mak tenke kose nehan.
“Ami mai fahe informasaun ba estudante sira iha EBF Kamea, ho objetivu atu fahe informasaun ba estudante sira oinsa estudante sira bele prevene moras nehan,”, dehan Vise MS iha komemorasaun loron mundial ba
saude oral iha EBF Kamea-Dili, Kuarta-Feira (20/03/2019).
Reprezentante MS hatutan, maneira atu prevene
moras saude oral, importante mak kose nehan loron ida dala rua uza pepsodente
no mós labele han arbiru buat ne’ebé midar loron-loron, se lae estraga ita nia
nehan, se nehan aat ita labele konsumu hahan ho diak.
“Ho komemorasaun saude oral ne’e, hakarak informa ba estudante sira katak, tenke kuidadu nehan tanba nehan importante, bainhira nehan aat halo ita la
iha vontade at han hahan neebe diak, tan nee”, Diretora sujere.
Iha fatin hanesan, Diretora EBF Kamea, Idalina
Pinto, agradese ba Kompañia Pixelasia Production iha Timor Leste serbisu
hamutuk ho Ministeriu Saude (MS) no Ministeriu Edukasaun (ME) hodi selebra
loron mundial saude oral iha sira nia eskola.
“Ami hetan oportunidade husi parte kompañia
komemora loron mundial saude oral iha ami nia eskola ida ne’e, ami agradese,
tanba ho komemorasaun ne’e bele fo koiñesementu ba ami nia estudante sira,
oinsa halo prevensaun ba sira nia saude,” Diretora EBF Kamea agradese.
Nia sublina, durante ne’e mós professor sira
sempre ba estudante sira oinsa atu kuidadu nehan liu husi kose nehan. Nudar meius
ida atu fo edukasaun sivika ba estudante sira para sira bele pratika lorloron oinsa
atu kose nehan.**
Reportajen
: João Tilman/ Angela
