(Grace Media), Dili –Grupu kreatividade oras ne’e faan
sasan tradisional iha area Lecidere, Suku Bidau Santana, Postu Administrativo
Kristu-Rei, Municipio Dili, objetivu promove sasan tradisional Timor Leste
nian.
Tuir Negosiante Francisca Cardoso
hateten katak, atividade faan sasan tradisional iha area Largo Lecidere ne’e
diak no seguru tanba laiha problema ida hodi impede sira nia atividade.
“Tuir hau
nia hare, ami faan sasan tradisional iha fatin ida ne’e diak no siguru ba ami, no ami iha ne’e besik semana ida loron rua
ona, maibé ema barak mak seidauk hatene lolos katak ami permanente iha fatin
ne’e”, dehan Francisca ba jornalista iha Licedere – Dili, Tersa-Feira(05/03/2019).
Negosiante
hatutan, fatin faan sasan iha Lecidere seguru ba sira tanba ne’e sira planu atu
hadia diak liu tan iha future, maibé presiza apoiu nafatin husi Governu atu
nune’e bele faan sasan labele iha perturbasaun husi ema ruma.
“Tuir ami
nia planu hakarak atu hadia diak deit, ami nia fatin ida ne’e atu nune’e bele
seguru ba ami nia sasan, ami rai hela iha tempu kalan, nune’e ami mos husu ba
parte kompetente atu bele hadia diak deit, ami nia fatin ida ne’e,” Francisca
sujere.
Iha sorin seluk, Responsavel Grupu
Bobometo, Rosalina da Costa, esplika katak hanesan Xefe grupu senti kontente
tanba iha fatin refere diak ba sira. No sira fila ba uma maske la barak maibé
sira mós bele lori netik osan ituan hodi bele suporta fali familia uma laran.
“Hau senti kontenti tanba iha fatin ida
ne’e diak ba ami, ami nia sasan tradisional hirak ne’e no ema ne’ebé hare laran
monu bele hola ami nia sasan hirak ne’e tamba ami nia produtu ne’e mos
kualidade ne’ebé diak,” nia garante.
Reportajen:
Miguel Das Neves Soriano
