(Grace Media), DILI-Estudante Departementu Jornalismu
husi Sentru Formasaun Grace For Development (GFD) realiza study tour hodi vizita Jornal Dili Post (JDP), objetivu lori
estudante sira haree direitamente funsionamentu serbisu JDP nian.
Tuir Xefe Departementu Grace Media-GFD,
Raimundo Sarmento Fraga informa katak, vizita ne’e sai hanesan Study
Tour ida, atu lori estudante sira haree direitamente lalaok produsaun
jornal inklui serbisu jornalista, atu fasilita estudante sira hodi hatene,
nune’e sai hanesan esperensia ida ba sira iha futuru.
“Estudante Departamentu Jornalismu vizita
Jornal Dili Post, hanesan programa ida study tour atu lori estudante sira hatene
prosesu produsaun jornal no serbisu jornalista nian iha Jornal Dili Post, atu
haklean liu tan koñesimentu estudante nian,” dehan Fraga ba Jornalista Grace Media iha Jornal Dili Post, Becora-Dili,
Kinta-Feira (7/03/2019).
Xefe Departementu argumenta, vizita estudante
GFD ba JDP ne’e foin dala ida, ho total estudante hamutuk 102. No koperasaun
serbisu entre JDP ho GFD durante ne’e lao diak, tanba durante ne’e JDP simu ona
estudante barak hala’o estajiu iha JDP ho susesu.
“Husi GFD agradese tebes ba estrutura
no membru Jornal Dili Post, ho laran luak hodi simu estudante, halo vizita iha
fatin ida ne’e, ho sira nia pasensia hodi hein ita, no konesege lori duni
estudante sira ba koñese departementu sira Jornal Dili Post,” Xefe Departementu
Media agradese.
Iha fatin hanesan, Koordenador
Kobertura Jornal Dili Post, Leonito da
silva esplika, apresia ho estudante GFD nia prezensa, tanba bele mai observa
direitamente kondisaun serbisu no fasilidade ne’ebé Dili Post uza hodi halo produsaun jornal.
‘’Ami husi parte Dili post apresia
tebes ho prejensa estudante GFD mai vizita Jornal Dili Post, hodi observa
direitamente konaba kondisaun no fasilidade ne’ebé Dili Post iha, ami mós iha departemntu 5 mak,
departemntu rekursus humanus, finansas, logistik no mós iha redasaun Dili Post,
oras ne’e ema hamutuk 15 mak serbisu,” Leonito sublina.
Relasiona ho vizita ne’e, nia
rekomenda, Sentru Formasaun GFD labele hanoin deit produs alunus, maibé presiza mós kria kondisaun ho seguru,
atu nune’e estudante sira bele aprende ho diak, liu-liu ba area espesifiku hodi formando sira bele
komprende didiak knar jornalista.
Entertantu, Estudante GFD, Miguel das Neves Soares hato’o sente
kontente, tanba hala’o vizita iha Jornal Dili Post, ne’e hanesan oportunidade
ida atu bele aprende kona-ba lala’ok servisu Jornalista sira nian iha servisu
fatin.
“Hau hanesan estudante, hau sente
kontenti, ohin loron mestri bele lori ami mai observa direita iha Jornal Dili Post,
haree direitamente kondisaun no fasilidade ne’ebé Jornal Dili Post sai hanesan
lisaun ba ami aprende,’’ Miguel haklaken.
Miguel hatutan, vizita ne’e konsege
hetan esperensia barak, tanba observa direita departementu sira hanesan Sala
Redasaun, Konsellu Redasaun, Sala Produsaun, Sala Layout no Sala produsaun
Jornal liu-liu makina ne’ebé uza halo produsaun.
“Hau
hakarak hato’o obrigado ba Jornal Dili Post tanba bele simu ami ho diak, hodi
fo informasaun barak ba ami hanesan estudante, hau hakarak husu tan ba Jornal
Dili Post se karik, ami mai pratika simu nafatin ami husi Sentru formasaun GFD,
atu nune’e ami hatene klean liu tan kona-ba knar jornalista nian,” Miguel
sujere.**
Reportajen : Margarida Vieira / Sandro
Amaral
