(Grace Media), Dili-Jardin Largo Lecidere nudar fatin turismu, hodi atrai ema hala’o vizita iha fatin ne’ebá, maibé ohin loron kondisaun haris fatin kontinua aat no laiha atensaun husi Governu.
Tuir Vijitantes Jardin Largo Lecidere, Ronal Carlos Dos Santos Ribeiro hateten katak, hanesan vizitante sente triste tebes tanba haree kondisaun haris fatin iha Jardin Largo Lecidere, aat hanesan bee laiha, lixu soe iha haris fatin laran.
‟Hau hanesan Vizitantes iha fatin ne’e, hare ba kondisaun haris fatin ne’ebé mak oras ne’e aat hela, vizitante balun ne’ebé utiliza haris fatin ne’e la ho kuidadu, sira uza tuir sira nia hakarak,” dehan Ronal ba Jornalista Grace Media iha Largo Lecidere-Dili,Kinta (30/01/2019).
Ronal sublina, ho problema haris fatin ne’ebé aat iha jardin Largo Lecidere, nia husu ba governu hodi rejolve lalais problema, tanba fatin ne’e, sai fatin turismu hodi atrai ema hotu hala’o vizita.
“Hau hanesan vizitante, husu ba governu ka ministeriu kompetente ne’ebé toma konta área turismo, kria maneira oinsa hodi bele rezolve problema ne’e, kapital Dili hanesan odamatan bo’ot ba nasaun hotu-hotu, dala ruma vizitantes husi rai liur mós mai vizita, ne’e duni, tenke kria kondisaun ne’ebé mak diak,” sujere Ronal.
Iha fatin hanesan Vizitante, Octavio dos Santos informa, haris fatin oras ne’e la favorabel ba vizitante sira, tanba iha haris fatin laran, la iha bee moos atu fasilita vizitante sira uza.
“Hau hanesan vizitante iha Largo Lecidere, husu ba governu hodi hari fila fali haris fatin foun, tanba haris fatin iha Largo Lecidere agora ne’e aat no mós tenke halo instalasaun bee moos ho diak, atu nune’e ita uja haris fatin ho diak,” Ocatavio rekomenda.
Enternato Serviso Saneamentu Municipiu Dili, Jorje Ramos Dos Reis, informa katak, haris fatin iha Jardin Largo Lecidere ne’ebé oras ne’e la favorabel tanba komunidade balun mak seidauk iha konsiensia hodi uja la ho kuidadu no sempre soe foer arbiru no estraga sasan ne’ebé governu hadia.
“Atu hateten deit wainhira buat ne’ebé governu sei bele hare no kontrola entaun husik governu mak hare deit, lalika entrega fali ba kompañia. Entrega ba kompañia servisu lahanesan ona, uluk ami mak kontrola jardin, ami sei kontrola no ense bee. Entrega ba kompañia relidade sai hanesan ne’e, be’e iha haris fatin mós la iha, lixu mós nakonu iha haris fatin, kompañia dun ba governu, depois governu dun ba kompañia entaun ida ne’ebé mak los,” Jorge lamenta.**
Reportagem: Margarita Vieira
