(Grace Media)-Dili – Eskola Sekundaria Jeral (ESJ) Finantil, hanesan eskola publika iha Timor-Leste, maibé ohin loron kontinua hasoru problema Falta kadeira, meza no mós sala aulas hodi difikulta estudante sira nia prosesu aprendisajen.
Tuir Estudante ESJ Finantil, Armindo Nasimento informa katak, hanesan estudante sente triste tebes, tanba durante ne’e eskola Finantil enfrenta problema hanesan falta kadeira, meza no sala aulas, maibé to’o ohin loron Governu liu-liu Ministeriu Edukasaun (ME) seidauk resolve.
“Hau hanesan estudante, hau sente triste tanba estadu aloka ona orsamentu barak, maibé ami nia eskola sekundaria Finantil, sei hasoru nafatin problema falta kadeira,meza no sala aulas,” dehan Armindo jornalista Grace Media iha eskola sekundaria Finantil Ai-mutin-Dili, sexta ( 08/ 02/2019 ).
Estudante haktuir, hanesan estudante durante ne’e, sira hasoru buat barak mak falta ba sira hanesan fatin eskola klot, obrigado eskola tenke akumula 70 to’o 80 hamutuk iha sala aula ida no estudante sira ema nain 2 no 3 tenke uza kadeira ida.
“Hau hanesan estudante, ezije tebes governu liu-liu Ministru Edukasaun (ME), hodi resolve problema ne’ebé eskola hasoru, atu fasilita ba ami nia apredisajen,”estudante sujere.
Relasiona problema ne’e, Diretor ESJ Finantil, Aloysius M. Berek rekoinese katak, problema meza, kadeira no sala ula menus ne’e laos akontese deit iha eskola Finantil, maibé eskola hotu iha Timor laran hasoru inklui eskola Finantil.
“Hau hanesan Diretor Eskola Sekundaria Jeral Finantil, hau bele dehan katak maioria kadeira no meza iha eskola ida ne’e aat htu, falta fasilidade hanesan livru, professor sira ne’ebé hanorin iha ne’e hau fo konfiansa ba sira, ida-idak buka materia hodi hanorin estudante sira,” Preokupa Diretor.
Diretor sublina, hanesan diretor eskola durante ne’e halo ona proposta no planu atu entrega ba Ministeriu Edukasaun (ME) hodi tau matan ba eskola ne’e tanba eskola ne’e nudar eskola publika ida iha Timor-Leste.
“Hau hanesan diretor, hau sei halo relatoriu atu husu apoiu governu nian ba eskola ne’e, atu nune’e ami bele loke tan, ami nia sala aulas 2. Ami mós hato’o tia ona ami nia planu iha relatorio semana kotuk inklui dadus balu,” Diretor haklaken.***
Reportajen: Romandina de Araújo
